Хөшгийн хөндийн нисэх буудал ашиглалт ороход бэлэн болжээ. Тус нисэх буудлын барилгын ажил дуусч техникийн комисс үзлэг шалгалт хийж эхлэв. Ингээд ирэх сараас улсын комисс мөн үзлэг шалтгалт хийж хүлээн авах төлөвлөгөө байна. Энэ нисэх буудал сүүлийн жилүүдэд баригдсан хамгийн том барилга, хөрөнгө оруулалт болоод байгаа юм.

Хөшгийн хөндийд баригдсан уг нисэх буудал эхний ээлжинд жилд гурван сая хүн хүлээн авах хүчин чадалтай. Тэгэхээр цагт 1500 хүнд үйлчилхэд ачаалал үүсэхгүй аж. Хүчин чадлыг нь тодруулбал, зургаан онгоц хүзүүвчээр зорчигчоо зэрэг суулгаж, задгай талбай дээрээс 13 онгоц нисэх бүрэн бололцоотой гэсэн үг. Хөшигийн хөндийн нисэх буудлын нийт санхүүжилт нь 560 сая ам.доллар юм.

Уг нисэх буудлын барилгын ажлын ерөнхий гүйцэтгэгчээр Японы  “Мицубиши Чиёода” түншлэл ажилласан. Харин  ерөнхий туслан гүйцэтгэгчээр Солонгосын “Самсунг Си энд Ти” корпорац оролцжээ. Эл  төслийн бүтээн байгуулалтад нийт 40 гаруй компани ажилласан. Эдгээр компанийн 70 гаруй хувь нь Монголын аж ахуйн нэгж. Үлдсэн нь Солонгос, хятадын компаниуд.  Ийнхүү ирэх оноос монголчууд төдийгүй жуулчид Хөшигийн хөндийн нисэх буудлаар үйлчлүүлэх болоод байна.