Хэд хоногийн өмнөөс их, дээд сургуулиудын оюутнуудын дансанд 2015-2016 оны хичээлийн жилийн “Үндэсний тэтгэлэг”-ийн үлдэгдэл мөнгө орсон. Энэхүү тэтгэлгийг нэг хичээлийн жилд 10 хүртэлх сарын турш олгодог байгаа. Тэтгэлэг олгох нийт хугацаа нь тухайн мэргэжлийн сургалтын хөтөлбөрт заасан жилээс хэтэрдэггүй бөгөөд хичээлийн жилийн нэг улиралд 12-оос доошгүй багц цагийн хичээл судалж, дүгнүүлсэн, хичээлийн жилийн өмнөх улирлын голч дүн нь 3.0-оос доошгүй үнэлэгдсэн, элсэлтийн журмын шаардлагыг ханган элссэн өдрийн ангийн бакалаврын хөтөлбөрийн суралцагчид авдаг. Мөн өдрийн ангид суралцаж байгаа магистр, докторын хөтөлбөрт суралцагчид авдаг. Тодруулбал, хичээлийн жилийн нэг улиралд 10-аас доошгүй багц цагийн хичээл судалж, дүгнүүлсэн, магистрын хөтөлбөрт шинээр элсэгчийн бакалаврын дипломын голч дүн нь 3.2-оос доошгүй, докторын хөтөлбөрт шинээр элсэгчийн магистрын дипломын голч дүн нь 3.5-аас доошгүй байх шалгууртай. Харамсалтай нь, энэ удаад буюу 9-12 дугаар сард магистр, докторууд үндэсний тэтгэлэг болох 70,200-д хамрагдахгүй болохыг мэдэгджээ. Энэ нь санхүүжилт байхгүйтэй холбоотой гэнэ.