Монгол-Оросын хувь нийлүүлсэн “Улаанбаатар төмөр зам” нийгэмлэгийн Ерөнхий хороо өнгөрсөн долоо хоногийн баасан гаригт хуралдаж, “Монголын төмөр зам” ТӨХК-ийн эзэмшлийн “СКD4B” зүтгүүрээр гол замдаа тээвэрлэлт хийхийг зөвшөөрсөн шийдвэр гаргажээ.  “Монголын төмөр зам” компани Хятадын хөнгөлөлттэй зээлээр сүүлийн үеийн технологийн дагуу хийлгэсэн “СКD4B” зүтгүүр таван жилийн дараа ийн зам дээр гарахаар болсон байна. Хэдийгээр зүтгүүрийн хүчин чадлын хувьд “Улаанбаатар төмөр зам” нийгэмлэгийн одоо явж буй зүтгүүрээс хавьгүй өндөр ч тус нийгэмлэг Хятад компанийн үйлдвэрлэсэн тоног төхөөрөмжийг ашиглахгүй гэснээс үүдэж сул зогсоход хүрээд байсан билээ.  Монголын төмөр зам компанийн мэдээлснээр “СКD4В” зүтгүүр нь 3300 морины хүчин чадалтай бөгөөд 2016 онд Төмөртэй-Хандгайт чиглэлд нийт 800 мянга гаруй тонн төмрийн хүдэр тээвэрлэжээ.
Улаанбаатар төмөр зам нийгэмлэгийн ерөнхий хорооны энэ удаагийн хурлаар 2017 оны тээвэрлэлтийн төлөвлөгөөг батлахдаа  улс орны эдийн засгийн дотоод нөхцөл байдал, гадаад зах зээлийн нөлөөллийг харгалзан хэмжээг төлөвлөн хэлэлцсэн гэнэ.