Татварын ерөнхий газар энэ оны эхний хагаст улсын төсөвт нэг их наяд 53.7 тэрбум төгрөгийн орлого бүрдүүлэх ёстой байжээ. Гэтэл эхний зургаан сарын байдлаар гэхэд 791.1 тэрбум төгрөг төсөвт цугларч 200 гаруй тэрбум төгрөгөөр улсын орлого тасарчээ. Гэхдээ алдагдлаа нөхөөд явах бололцоотой гэж Татварын ерөнхий газраас үзэж байгаа аж. Учир нь, 2012 оны төсвийн орлогын төлөвлөгөө эхний хагас жилдээ өндөр ачаалалтай батлагдсан гэнэ. Өмнөх жилүүдэд оны эхний хагаст төсвийн нийт орлогын 40 орчим хувь, сүүлийн хагаст 60 орчим хувь нь төвлөрөхөөр тооцдог байв. Гэтэл энэ онд эсрэгээрээ батлагдсан нь бага зэрэг хүндрэл учруулж байгаа аж.