Зуслангийн эзэнгүй байшинд нэвтрэн орж мөнгөн аяга, зурагт, үнэт эдлэл хулгайлах хэрэг нэмэгджээ. Чингэлтэй дүүргийн 19 дүгээр хорооны нутаг дэвсгэр зуслангийн чиглэлд хамаардаг. Цагдаагийн хоёрдугаар хэлтсийн зуслан дахь цагдаагийн дэд хэсэг гэмт хэргээс урьдчилан сэргийлэх, таслан зогсоох чиглэлээр үүрэг гүйцэтгэдэг. Тиймээс тус хэлтсээс зуслангийн эзэнгүй байшингуудын судалгааг гаргаж, зурагжуулан нэгдсэн санд бүртгэн, эргүүлийн үйл ажиллагаагаар хяналт тавьж, иргэдийн өмч хөрөнгийг хамгаалан ажиллаж байна гэж Цагдаагийн ерөнхий газраас мэдээллээ. Хамгийн сүүлд зуслангийн байшингийн паркетан шалыг нь хуулж аваад явсан, LCD зурагтыг нь хулгайлсан хэргийг илрүүлжээ. Өвлийн цагт зуслангийн эзэнгүй байшингаас хулгай хийх хэргүүд гардаг. Тиймээс иргэд үнэт эд зүйлээ зуслангийн байшиндаа орхихгүй байх, гэрээ эзэнгүй орхиж байгаагаа зуслангийн манаачид мэдэгдэх, харуул хамгаалалтын байгуулагатай хамтарч ажиллах талаар санууллаа.