Ой тогтоолтын дэлхийн аварга шалгаруулах оюуны спортын тэмцээн Сингапур улсад энэ сарын 15-наас эхэлсэн. 25 дахь удаагийн тэмцээнд нийт 232 тамирчин ой тогтоолтын 10 төрлөөр бага, өсвөр, насанд хүрэгчдийн гэсэн ангилалд өрсөлдөж буй. Тус тэмцээнд эх орноо төлөөлж Монголын Оюун ухааны академийн 23 тамирчин багш, дасгалжуулагчийн хамт оролцож байна. Тэд тэмцээн эхэлснээс хойшхи хоёр өдрийн дотор долоон алт, есөн мөнгө, долоон хүрэл медаль буюу нийт авах боломжит 69 медалиас 23 медалийн болзол хангажээ. Мөн манай тамирчид өсвөр буюу дунд нас болон бага насны ангилалд дэлхийн таван дээд амжилтыг шинэчлэн тогтоосон байна.