Цус Сэлбэлт Судлалын Үндэсний Төвөөс сар болгоны 3-ныг “Цусаа бэлэглэх өдөр” болгон тэмдэглэдэг. Тэгвэл шинэ оны эхний Цусаа бэлэглэх өдрөөр доноруудаа урамшуулах ёслолыг JCI Капитал байгууллагатай хамтран зохион байгууллаа.

Эрдэнэт хүний ам аврах үнэтэй үйлсэд үнэлж баршгүйгээр хувь нэмрээ оруулсан хүмүүсийг үнэлж 70-аас дээш удаа цус өгсөн доноруудыг “Хүрэл донор”, 100-гаас дээш удаа цус өгсөн доноруудыг “Мөнгөн донор”, 150-иас дээш удаа цус өгсөн “Алтан донор”-оор, 10, 20 удаа цусаа бэлэглэсэн доноруудыг “Бахархал 10”, “Бахархал 20” тэмдгээр алдаршуулдаг аж.

Тэгвэл энэ удаагийн доноруудыг алдаршуулах үйл ажиллагаагаар Монгол Улсын анхны эмэгтэй, хоёр дахь “Алтан донор”-ыг шалгаруулсан юм. Тэр бол 1996 оноос цус цусны бүрэлдэхүүн хэсгээ бэлэглэсэн Даваа овогтой Эрдэнэчулуун гэх эмэгтэй байв. Мөн ес дэх “Мөнгөн донор”-оор Нацагдорж овогтой Баянзул тодорсон бол 34, 35, 36 дахь “Хүрэл донор”-оор Туяа овогтой Машбилэг, Лувсандорж овогтой Баянтунгалаг, Цэвээндулам овогтой Пүрэвгэрэл нар өргөмжлөгдлөө. Мөн “Бахархал” тэмдгийн эздээр есөн донор тодорсон юм.