Нийслэлийн иргэдийн төлөөлөгчдийн хурлын 2015 оны аравдугаар сарын 22-ны өдрийн 6/21 тоот тогтоолоор батлагдсан “Их, дээд сургууль, коллеж, мэргэжлийн сургалт үйлдвэрлэлийн төвийн сурагч, оюутанд нийтийн тээврийн “Цахим төлбөрийн карт” олгох, цэнэглэх, ашиглахад баримтлах журам”-ын дагуу оюутнуудад нийтийн тээврийн хөнгөлөлттэй зорчих карт олгож ашиглаж байгаа. Гэхдээ нийтийн тээврээр хөнгөлөлттэй үйлчлүүлэхдээ зөвхөн хичээл сургуульдаа явахдаа хөнгөлөлтөө эдлэх эрхтэй байдаг. Энэ нь хагас, бүтэн сайн болон бүх нийтийн амралтын өдрүүд, оюутны өвлийн амралтын хугацаанд хөнгөлөлттэй зорчих эрхээ ашиглах боломжгүй гэсэн үг юм. Тиймээс өвлийн амралттай холбоотойгоор Оюутны нийтийн тээврээр зорчих хөнгөлөлттэй эрхийг энэ сарын 1-31-нийг хүртэл хязгаарласан байна.
Тодруулбал, их дээд сургууль, коллеж, мэргэжлийн сургалт үйлдвэрлэлийн төвүүдийн сурагч, оюутнуудын өвлийн амралтын хугацаа харилцан адилгүй ч ихэвчлэн нэгдүгээр сарын 1-нээс 31-нийг хүртэлх хугацаанд таарч байгаа учир оюутны “Цахим төлбөрийн карт”-ын хөнгөлөлттэй зорчих эрхийг дээрх хугацаанд хязгаарласан аж. Харин ирэх сарын 1-нээс хөнгөлөлттэй зорчих эрх нь идэвхжих юм байна.