Сибирийн хүйтэн агаар өчигдрөөс нутгийн баруун хойд хэсэгт иржээ. Энэ нь өнөөдрөөс 19-нийг хүртэл ихэнх нутгаар хүйтний эрч чангарахад нөлөөлнө гэж Цаг уур, орчны шинжилгээний газраас мэдээллээ. Мөн ихэнх голын ай сав газраар 40-45 хэм хүрч хүйтрэх урьдчилсан таамаг гаргасан байна. Хүйтний эрч чангарснаар малын бэлчээрлэлт, авто болон төмөр замын тээвэр, цахилгаан эрчим хүчний шугам зэрэгт хүндрэл учруулахын зэрэгцээ, цас үргэлжлэн орсны улмаас өвөлжилтийн нөхцөл байдал хүндрэх нөхцөл бүрдэх төлөвтэй байгаа гэж анхаарууллаа.

Цаг уур, орчны шинжилгээний газраас гаргасан дээрх мэдээллийг Онцгой байдлын Ерөнхий газраас мөн олон нийтэд дамжуулж, “Хүчтэй салхи шуурганы үеэр иргэд, тээврийн хэрэгслийн жолооч нар хол, ойрын замд зорчихгүй байх, бага насны хүүхэд, өндөр настан болон хөгжлийн бэрхшээлтэй иргэдэд анхаарал тавих, холбогдох мэргэжлийн байгууллагуудаас гаргасан анхааруулах, сэрэмжлүүлэх мэдээллийг үндэслэн ажлаа зөв зохицуулах”-ыг зөвлөлөө. Мөн хүчтэй салхи шуурганы үеэр автозамын зорчих хэсэгт үүссэн хальтиргаа гулгааны улмаас зам, тээврийн осол гарах, автомашин олноор замд саатах, автомашины шатахуун дуусах, эвдрэх, иргэд холбоогүй болох зэрэг тохиолдол гарч, зорчигчдын амь нас, эрүүл мэндэд эрсдэл учирдаг тул зайлшгүй тохиолдолд тээврийн хэрэгслийн хөдөлгөөнийг хязгаарладаг тул Онцгой байдлын ерөнхий газрын 325726, 265726 дугаарын утсанд холбогдож мэдээлэл авахыг зөвлөв.