Нийслэлийн эрүүл мэндийн газрын дарга Л.Төмөрбаатар харьяа эрүүл мэндийн байгууллагын удирдах ажилтнуудтай уулзаж, цаг үеийн асуудлаар мэдээлэл солилцсон байна. Нийслэлийн хэмжээнд энэ оны нэгдүгээр сарын 10-ны байдлаар амбулаторийн 98 мянга 900 гаруй үзлэг хийгдсэнээс томуу, томуу төст өвчтэй 9873 тохиолдол оношлогджээ. Энэ нь нийт үзлэгийн 13 хувийг эзэлж байгаа ба өмнөх долоо хоногоос 2.2 хувиар буурсан үзүүлэлт аж. Нийт өвчлөгсдийн 77.4 хувийг 0-9 насны хүүхдүүд эзэлж байгаа бөгөөд орны ачаалал 16.4 хувиар нэмэгдсэн байна. Үүнтэй холбогдуулж нийслэлийн хэмжээнд нийт 400 орчим ор гаргаж дүүргийн эмнэлгүүдэд байршуулсан байна. Цаашид Улсын II төв эмнэлгт 30 ор, Батлан хамгаалах яамны цэргийн төв эмнэлэгт 50 ортой хүүхдийн тасаг шинээр нээн ажиллуулах бэлтгэл ажлыг хангаж байгаа аж.