Их Монгол улс байгуулагдсаны 806, Ардын хувьсгалын 91 жилийн ойн баяр наадмын өдрүүдэд хур бороо ихтэй байсан нь зарим аймагт үерийн аюул учруулжээ. Тухайлбал, нийслэлийн Баянзүрх, Баянгол, Налайх, Хан-Уул дүүрэг, Архангай аймгийн Жаргалант, Баян-Өлгий аймгийн Ногооннуур, Баянхонгор аймгийн Бууцагаан, Булган аймгийн Хангал, Орхон аймгийн Баян-Өндөр, Өвөрхангай аймгийн Уянга, Завхан аймгийн Алдархаан, Улиастай, Эрдэнэхайрхан сум, Сэлэнгэ аймгийн Орхон, Шаамар, Төв аймгийн Эрдэнэсант, Увс аймгийн Зүүнговь, Наранбулаг, Ховд аймгийн Алтай, Дөргөн зэрэг смын нутагт түр зуурын усархаг аадар бороо орж, аянга буусны улмаас таван иргэн түлэгдэж 18 хүн усанд осолдож амь насаа алджээ. Түүнчлэн 270 гаруй айлын гэр усанд автаж  364 толгой мал хорогдсон байна.