Цаг уур, орчны шинжилгээний газраас гаргасан урьдчилсан мэдээгээр ойрын өдрүүдэд ихэнх нутгаар цас орж, хүйтний эрч чангарах юм байна. Зарим нутгаар 40 хэмээс илүү хүйтэн болохыг мөн анхааруулж байна.
Энэ мэдээллийн талаар тус газрын Урьдчилан мэдээлэх хэлтсийн дарга Л.Оюунжаргалаас тодрууллаа.

-Ойрын өдрүүдэд хүйтний эрч чангарна гэж сэрэмжлүүлж байна. Нийслэлд хичнээн хэмийн хүйтэн байх бол?
-Ихэнх нутгаар хүйтэрнэ гэсэн урьдчилсан мэдээ бий. Энэ нь бүх нутгаар ерөнхийдөө хүйтний эрч 5-10 хэм нэмэгдэнэ гэсэн үг. Улаанбаатар хотын хамгийн хүйтэн хэсэг нь Яармаг, Нисэх орчим байдаг. Энэ хэсгүүдэд сарын 15-16-нд шилжих шөнө 36-38 хэм хүртэл хүйтэрсэн байна.

-Орон нутагт ч гэсэн хүйтэрч байна уу?
-Тийм ээ. Өчигдөр, уржигдраас эхлээд ихэнх нутгаар цас орж, хүйтэрч эхэлсэн. Өнөөдөр, маргаашнаас баруун, зүүн аймгийн нутгаар цас орж, цасан шуурга шуурах төлөвтэй байгаа. Салхины хурд 14-16 м/с хүрч ширүүсч Увс нуур, Идэр, Тэс, Хүрэн бэлчирийн хөндийгөөр шөнөдөө 41-46 хэм, өдөртөө 32 хүртэл хэм хүртэл хүйтэрнэ. Тиймээс малын бэлчээрлэлт, авто болон төмөр замын тээвэр, цахилгаан эрчим хүчний шугам зэрэгт хүндрэл учрах, мөн өвөлжилтийн нөхцөл байдал хүндрэх магадлалтайг анхааруулж байгаа.

-Хэзээнээс хүйтний эрч буурах бол?
-Энэ сарын 22-ноос эхлэн бүх нутгаар хүйтний эрч сулрах төлөвтэй байгаа. Цаг агаарын мэдээ өдөр тутам шинэчлэгдэж, өөрчлөгдөж байдаг учраас өдөр тутамд нь мэдээллээ үзэж байх хэрэгтэй.