Лалын хэт даврагсад АНУ руу нэвтрэхээс урьдчилан сэргийлэх арга хэмжээг чангатгах тухай зарлигт Ерөнхийлөгч Дональд Трамп гарын үсэг зуржээ.

Д.Трамп өчигдөр БХЯ-ны байранд зочлох үеэрээ уг зарлигт гарын үсэг зурсан байна. Өнгөрсөн долоо хоногийн баасан гарагт тэрбээр тангараг өргөснөөсөө хойш Пентагонд анх удаагаа очсон нь энэ юм.

Тэрбээр хэлэхдээ “лалын хэт давруу үзэлт террористуудыг улс руугаа нэвтрүүлэхийг би хүсэхгүй байна. Манай орныг дэмжиж, манай улсын ард түмнийг хайрладаг хүмүүсийг л АНУ хүлээж авах болно” гэжээ.

Хэт давруу үзэлтнүүд нэвтрэхээс урьдчилан сэргийлэх арга хэмжээний хүрээнд АНУ-ын дүрвэгчид хүлээж авах хөтөлбөрийг 120 хоногоор зогсоох, “мэдэгдэхүйц өөрчлөлт” гарах хүртэл Сирийн дүрвэгчдийг хүлээж авахгүй байх, Ирак, Сири болон “террористууд баазтай” бусад улс орны иргэдийг 90 хоногийн хугацаанд АНУ руу нэвтрүүлэхгүй байх, Б.Обамагийн засаг захиргааны үед тогтоосон дээд хязгаарын 50 хүрэхгүй хувьтай тэнцэх тооны буюу 50 мянгаас хэтрэхгүй тооны дүрвэгчдийг 2017 онд хүлээж авах зэрэг арга хэмжээг авах ажээ.

Өнгөрсөн онд, Ерөнхийлөгч асан Б.Обамагийн засаг захиргаа Сирийн 10 мянган дүрвэгчийг, хөрш Канад 35 мянган цагаачийг хүлээж авсан байна.

Сонгуулийн кампанит ажлын үеэр Д.Трамп “хэрвээ би ерөнхийлөгчийн сонгуульд ялбал лалын шашинтнууд АНУ руу нэвтрэхийг бүрэн хориглоно” гэж нэг бус удаа мэдэгдэж байсан билээ.

Гэхдээ тэрбээр өнгөрсөн 11 дүгээр сард сонгуульд ялснаасаа хойш энэ тухай огт дурсаагүй байна.