"Эрдэнэс Тавантолгойн”-н нүүрсний тээвэрлэлт хийдэг компанийн зургаан жолооч үл мэдэгдэх шингэн уусны улмаас гурав нь амиа алдсан харамсалтай хэрэг гарсан билээ. Үлдсэн гурав нь Өмнөговь аймгийн Бүсийн оношилгоо, эмчилгээний төвийн Эрчимт эмчилгээний тасагт хэвтэн эмчлүүлж гемодиализ, хор тайлах, зүрх судас дэмжих эмчилгээ хийлгэжээ. Хамгийн сүүлийн мэдээллээр бол гурван өвчтний биеийн байдал тогтворжиж, Эрчимт эмчилгээний тасгаас Гэмтэл хордлогын тасагт шилжсэн бөгөөд эмчилгээ хэвийн үргэлжилж байгаа аж. Тэдний эмчилгээнд зориулж дөрвөн сая төгрөгийг аймгийн Онцгой байдлын газраас шийдвэрлэж өгсөн байна. Мөн тус аймагт үл мэдэгдэх шингэнийг өөр хүмүүс хэрэглэсэн эсэхийг тодорхойлохоор ажиллаж байгаа гэнэ. Жолооч нарын уусан гэх шингэнийг ямар зориулалтаар хэрэглэдэг, ямар шингэн болохыг Мэргэжлийн хяналтын газар, Цагдаагийн байгууллага шалгаж байгаа. Эдгээр байгууллагын дүгнэлт хараахан гараагүй байна.