Америкийн хууль сахиулагчид Флорида мужаас 75 настай Линли Бенсон Лембург гэгчийг Вьетнамын дайны үеэр АНУ-ын зэвсэгт хүчнээс оргосон хэмээн буруутган баривчилсан байна хэмээн Fox News телевиз мэдээлжээ. Одоо түүнийг цэргийн шүүхээр оруулах аюул нүүрлэж байна.

Телекомпанийн мэдээлснээр бол энэ хүн Уильям Майкл Робертсон нэрийн дор нуугдаж байжээ. Цагдаагийнхан түүнийг баривчлахаар очиход хаалга тайлж өгсөн эхнэр нь энэ тухай сонсоод бүр алмайрч орхисон гэнэ. Нөхөр нь энэ нууцаа түүнээс хамтран амьдарсан бүхий л хугацаандаа нууж байжээ.

Лембургийг саатуулахад тэрээр ямар ч эсэргүүцэл үзүүлээгүй байна. Түүнийг цагдаагийн газар авчран зэвсэгт хүчний архивт байгаа материалтай тулгаж үзэхийн тулд хурууны нь хээг авч. Зэвсэгт хүчний баазад аваачин байцаасан байна. Мөрдөн байцаагчид түүнийг Вьетнамын дайнаас  айсандаа 1972 онд цэргээс оргосон гэж сэжиглэж байгаа юм.

Мерион тойргийн цагдаагийн газрын төлөөлөгч Лорен Теттерайер “Лембург үнэхээр цэргээс оргон өөр нэрээр амьдарч Холбооны засгийн газрыг мэхэлж байсан уу, үгүй юу гэдгийг тогтооно. Тэр үед үнэхээр юу болсныг бид үнэнээр нь тогтоох болно” гэж хэлжээ.