ОХУ-ын Санкт-Петербургийн метронд галт тэрэг хоёр өртөөний дундах хонгилд явж байх үед амиа золиослогч бөмбөг дэлбэлсний улмаас 11 хүн амь алдаж, 45 хүн хүнд  хөнгөн шархадсан аймшигт явдал гарсан.

Харин галт тэрэгний машинч нь галт тэргээ хонгилд зогсоолгүй өртөөнд хүргэсэн нь шархдаж бэртсэн олон хүний амийг аварсан явдал гэж оросын хэвлэлүүд бичиж байна.

Москвагийн хотын думын гишүүн, Холбооны аюулгүй байдлын албаны зөвлөх гишүүн, “Альфа” тусгай салааны орлогч асан Сергей Гончаров “60 минут” телевизэд өгсөн ярилцлагадаа галт тэрэгний машинч үнэхээр олон хүний амийг аварсан гэжээ.

“Машинч үнэхээр олон хүний амийг аварсан. Дэлбэрэлт болж Москвад л хүмүүс бүр сандралд ороод байхад яг газар дээр нь дэлбэрэлтэд өртсөн хүмүүсийн хувьд ямар байхав. Хүмүүс сандралдаж шокт ороод байхад галт тэрэг өртөөний дундах харанхуй хонгилд зогссон бол яахав. Хол газар явган явна, эмнэлгийн тусламж очих гэж цаг алдана. Тэгэхээр машинч үнэхээр зөв ажиллаж олон хүний амийг аварсан” гэж Гончаров тэмдэглэжээ.

Хэвлэлүүдийн мэдээлж байгаагаар Александр К гэгч нь Санкт-Петербургийн метроны галт тэрэгний жолоочоор  15 жил ажиллаж байгаа хүн юм байна.