Улсын хэмжээнд 330 сум, нийслэлийн 152 хороонд Өрхийн амьжиргааны түвшинг тодорхойлох ажлын 10 дахь өдрөө үргэлжлэн өчигдөр албан ёсоор дууслаа. Арван өдрийн дараах байдлаар мэдээллийн сан дахь нийт өрхийн тооны 95,2  хувьд  хүрч ажилласан байна.

Аймаг, дүүргүүдийн нэгдсэн гүйцэтгэлээр Говьсүмбэр, Дорнод, Булган, Хэнтий, Багахангай, Сонгинохайрхан, Чингэлтэй, Увс, Төв зэрэг аймаг, дүүргүүдэд өрхийн хамруулалт хамгийн өндөр хийгдсэн байна. Цаг агаарын хүндрэл, малын гоц халдварт өвчний голомт бүхий зарим аймгуудад болох Баянхонгор, Говь-Алтай, Өвөрхангай аймгийн зарим сумд, Дорнод аймгийн Цагаан овоо сумдад мэдээлэл цуглуулах ажлыг 5 хоногоор сунган ажиллаж байна. Мөн нийслэлийн зарим дүүргүүд болон зарим аймгийн төвүүдэд шар усны үер, ажлын өдрүүдэд өрхүүд гэртээ байхгүй байсны улмаас мэдээлэл цуглуулалтад хамрагдаж амжаагүй байгаа шалгаануудад үндэслэн судалгаанд хамрагдаагүй үлдсэн өрхүүдийг судалгаанд нэмж хамруулах зорилгоор хугацааг 3 хоногоор сунган ажиллуулахаар зохион байгуулалт хийж байгаа юм.

Мөн зарим өрхүүдийн хувьд “судалгаанд хамрагдвал хүүхдийн мөнгөө үргэлжлүүлэн авахгүй болно” гэсэн ташаа ойлголтоос үүдэн судалгаанд хамрагдахаас татгалзсан тохиолдолууд гарч байв. Тэгвэл энэ удаагийн судалгааны үр дүнг гаргаж, өрхийн амьжиргааны түвшний оноог улсын хэмжээнд шинэчлэн тогтоосны дагуу ирэх 06-р сарын 01-нээс эхлэн төрөөс үзүүлэх аливаа үйлчилгээ, хөтөлбөр, арга хэмжээнд энэхүү мэдээллийн санг  ашиглах бөгөөд одоо ашиглагдаж байгаа мэдээллийн сангаас олгож байсан халамжийн үйлчилгээнүүдийн олголтыг зогсоож шинээр үүсгэсэн мэдээллийн сангаас үйлчилгээ, хөтөлбөрт хамрагдах зорилтот бүлэг иргэнийг сонгох юм. Мөн сум, хороодод амьжиргааны түвшний талаар олгодог Засаг даргын тодорхойлолтыг мөн энэ судалгааны мэдээллийн сангийн шинэчилсэн үр дүнд үндэслэн олгох ажил эхлэх юм байна.