Өнөөдрийн  байдлаар 12.2 сая хээлтэгч төллөж, гарсан төлийн 97.7 хувь нь бойжиж байна. Үүнээс 30 мянган ботго, 72.7 мянган унага, 226.9 мянган тугал, 6.1 сая хурга, 5.6 сая ишиг бойжиж байна. 

Манай улсын мал сүргийн тоо 2016 оны жилийн эцэст 61 сая толгойд хүрч, өмнөх оныхоосоо 9.9 хувиар өсчээ.  Өнгөрөгч онд  26.1 хээлтэгчээс улсын хэмжээнд  55.8 мянган ботго, 823.4 мянган унага, 1.2 сая тугал, 10 сая хурга, 8.8 сая ишиг хүлээн авсан.

Харин энэ жил нийт дүнгээрээ 20 сая төл хүлээн авахаар тооцоолж байгаа юм байна.

Мөн улсын аварга малчдын хаврын мал маллагааны арга туршлагыг түгээн дэлгэрүүлэх, залуу малчид, төлчин хүүхдүүдийг урамшуулах зорилгоор монголын радиогоор  “Төл таван эрдэнэ” нэвтрүүлгийг  гуравдугаар сарын 15-наас гурван сарын хугацаатай явуулж буй. Түүнчлэн яамны зүгээс аймгуудтай холбогдох “Шуурхай штаб” ажиллан, хаврын шар усны үер, салхи шуурга, мал төллөлтийн үеийн зөвлөгөө зөвлөмжийг өгч ажиллаж байна хэмээн мэдээллээ.