Улаанбаатар хотыг гадна тойрог бүхий замтай болгох үйл ажиллагааны нэг хэсэг болох Дарь-Эхийг Хайлаасттай хатуу хучилттай 1.4 км, 57 метр урт гүүрээр холбох ажлын нээлтийг хийлээ.

Нээлтэд УИХ-ын гишүүн, БОАЖ-ын сайд Д.Оюунхорол, УИХ-ын гишүүн Ө.Энхтүшин, Ц.Цогзолмаа, Нийслэлийн Засаг даргын Дэд бүтцийн асуудал хариуцсан орлогч П.Баярхүү, Нийслэлийн авто замын хөгжлийн дарга Ж.Тогтохбаяр нар оролцсон юм. УИХ-ын гишүүн Д.Оюунхорол БЗД-ийн 49 дүгээр тойргоос сонгогдсон бөгөөд Дарь-Эх орчмын айлууд үүнд багтдаг. Тиймээс энэхүү ажлын төсөв хөрөнгийг шийдүүлэхэд Засгийн газрын гишүүнийхээ хувиар маш их үүрэг гүйцэтгэснийг Нийслэлийн Засаг даргын Дэд бүтцийн асуудал хариуцсан орлогч П.Баярхүү энэ үеэр хэлж байлаа.

Харин УИХ-ын гишүүн, БОАЖ-ын сайд Д.Оюунхорол энэ үеэр “Улаанбаатар хотыг гадна тойрог бүхий замтай болгох ажлыг эхлүүлж байгаа Нийслэлийн Засаг даргын Тамгын газрынхандаа баяр хүргэе. Энэхүү ажлыг гардаж хийхээр болсон “Мотор сервис” компанийнхандаа амжилт хүсье. Улаанбаатар хотын замын ачааллыг бууруулах үүднээс авч хэрэгжүүлж байгаа ажлын нэг хэсэг болох Дарь-Эхийг Хайлаасттай хатуу хучилттай замаар холбох ажил дууссанаар 100 айл орчмын түгжрэл буурна. Цаашлаад Улаанбаатар хотыг гадна тойрог бүхий замтай босгосноор замын түгжрэлгүй болох эхлэл тавигдна гэдэгт итгэлтэй байна. Хамгийн эхний ээлжинд сонгогдсон тойрог болох Дарь-Эхийнхнийгээ хамруулах гэж ажилласны үр дүн гарч байгаад баяртай байна” хэмээсэн юм.

Шинээр барих зам нь 14 метрийн зорчих хэсгийн өргөнтэй, 4 эгнээтэй, 2 талдаа 2 метр өргөн ногоон байгууламжтай, 3 метр өргөн явган хүний зам, гэрэлтүүлэг, ус зайлуулах хоолой бүхий юм байна.