Цөмийн энергийн газар, “Мон-Аме” шинжлэх ухааны төв хамтран "Цөмийн технологийн хэрэглээ өнөө ба ирээдүй" сэдэвт сэтгүүлчдэд зориулсан сургалтыг энэ сарын 27, 28-нд зохион байгуулахаар болжээ. Энэ сургалт нь цөмийн технологийн хэрэглээ, ач холбогдол, үр нөлөөний талаар сэтгүүлчдийн ойлголт мэдлэгийг дээшлүүлэх зорилготой аж. Сургалтын хөтөлбөрийн хувьд сэтгүүлчид мэдээ, сурвалжлага бэлтгэх боломж бүрдүүлж байгаагаараа онцлогтой. Түүнчлэн цөмийн технологийг ашиглаж байгаа салбар, байгууллагад очиж, төсөл хөтөлбөрийн үр дүнтэй танилцах аялал ч хийх юм байна. Тухайлбал, Хавдар судлалын үндэсний төв, Геологийн төв лаборатор, Мал эмнэлэгийн хүрээлэнд хэрэгжиж буй төсөл хөтөлбөрийн үр дүнтэй танилцуулна. Мөн Дархан-Уул аймгийн Ургамал газар тариалангийн Сургалт, Эрдэм шинжилгээний хүрээлэнгийн үйл ажиллагаатай сэтгүүлчдийг танилцуулах юм байна.
Харин сургалтын хоёр дахь өдөр буюу 28-нд ЦЭГ-ын даргын үүргийн түр орлон гүйцэтгэгч Г.Манлайжав Цөмийн технологийг энхийн зорилгоор хэрхэн ашиглаж байгаа талаар илтгэл тавьж, сургалтын талаар оролцогч сэтгүүлчидтэй санал солилцсоноор сургалт өндөрлөнө.