Америкийн Санта-Барбара мужийн 2 суурингийн 22 мянган иргэнийг заавал нүүлгэн шилжүүлэх шаардлагатай болжээ. Калифорнид 2 долоо хоногийн турш асч байгаа түймрээс улбаалж ийн хэд хэдэн мужид иргэдийг зайлшгүй нүүлгэн шилжүүлж эхлээд буй юм. Лос-Анжелосоос 160 км-ийн хойд зүгт орших Карпинтери болон Монтесито суурингийн иргэд гэр орноо орхин нүүж эхэлсэн байна. Түймрийн улмаас одоогоор 754 барилга байгууламж сүйдсэн бол цаашид 15 мянган объект аюултай, эрсдэлтэй байдалд орсон гэжээ. 

ТАСС агентлагийн мэдээлснээр  Калифорнийн 98 мянган иргэн өөрийн орон гэртээ эргэн очих боломжгүй болсон аж.  Түймэр Лос-Анжелос, Вентура, Санта-Барбара, Сан-Диего хотуудад ч аюул учруулж эхлээд буй.  22 м/с хурдтай хуурай салхи нь түймэр ийн хурдтай тархах шалтгаан болж байгаа гэнэ.