Барилгын салбарт гарч буй ослын улмаас бэртэж гэмтэн хөдөлмөрийн чадвараа алдах, амь насаараа хохирох явдал түгээмэл байна. Сүүлийн 5 жилд барилгын салбарт зөвхөн нийслэлд 272 осол гарч НМХГ-т бүртгэгдсэн байна. Энэ нь нийслэлийн хэмжээнд гарсан нийт үйлдвэрлэлийн ослын 26,3 хувийг эзэлж байгаа юм. Мөн нийслэлийн хэмжээнд 237 хүн үйлдвэрлэлийн ослоор амь үрэгдсэнээс 45,9 хувь буюу 109 тохиолдол барилгын салбарт бүртгэгдсэн байна. Энэ нь барилгын үйлдвэрлэл явуулж аж ахуйн нэгж байгууллагууд хөдөлмөрийн аюулгүй ажиллагааны хууль дүрэм, заавар стандартыг чанд мөрдөж ажилладаггүйгээс үүдэн гарсан хор уршиг юм.
Барилгын компаниуд хувь хүн, бригадтай гэрээ байгуулж ажиллахдаа, хөдөлмөрийн аюулгүй байдлын тухай тусгадаггүй, хөдөлмөрийн аюулгүй байдал хариуцсан орон тооны ажилтан байдаггүй, энэ асуудалд зарцуулах хөрөнгийг дэндүү бага тусгадаг зэрэг зөрчлийг байнга гаргасаар байна.