Шатахууны үнэ нэмэгдсэнтэй зэрэгцээд хүмүүсийн анхаарлын төвд байсан нэг мэдээлэл нь “ОХУ-ын нефтийн хамгийн том компани болох “Роснефть”-ийн зүгээс бидэнд Монгол Улс борлуулалт хийх эрх өгвөл 30 хувь хямд үнээр шатахуун заръя гэсэн санал хэлсэн” гэх байв. Энэ талаар ШӨХТГ-ын дарга Б.Лхагва өнөөдөр хийсэн хэвлэлийн бага хурлын үеэр дараахь мэдээллийг өглөө.
-“Роснефть” санал тавьсан гэх мэдээлэл гарах болсон. Энэ талаар?
-Роснефтийн бензин, шатахууныг нь оруулаад ирчихвэл бүх зүйл сайхан болох мэт мэдээлэл яваад байна. Иргэд ч энэ чиглэлийн саналыг хэлж байна. Тэгэхээр энэ асуудалд хуулийн тайлбар хэлэх нь зүйтэй гэж бодож байна. Монгол Улсын Газрын тосны хуульд нэг заалт бий. Иргэд мэдэж байх хэрэгтэй болов уу. Төөрөлдөж болохгүй. 7.2-т Монгол Улсад газрын тосны бүтээгдэхүүний 30-аас дээш хувийг дангаараа нийлүүлж байгаа гадаадын хуулийн этгээд дотоодын зах зээлд өөрийн хөрөнгө оруулалт бүхий хуулийн этгээд болон өөрийн харьяалал, хяналтад байдаг нэгжээрээ дамжуулан бүтээгдэхүүнээ борлуулахыг хориглоно гэж бий. Хууль маань ийм байгаа учраас
Роснефть орж ирэх боломж өнөөдрийн төвшинд байхгүй. Газрын тосны хуулинд нэмэлт өөрчлөлт оруулах, нефть импортлогч аж ахуйн нэгж байгууллагад хүлээлгэх үүрэг, хариуцлагыг нэлээд өндөр түвшинд тавих, хүлээсэн үүргээ зөрчсөн тохиолдолд ямар авах хэмжээ авах вэ гэдгийг хуульчилж өгөх шаардлагатай байна. Манай байгууллагын зүгээс энэ хуульд нэмэлт өөрчлөлт оруулах тал дээр саналаа хэлж, холбогдох эрх бүхий байгууллагад нь хандана.