Улаанбаатар хотын Ерөнхий менежерийн шуурхай зөвлөгөөнөөс нийтийн тээврийн үйлчилгээ эрхлэдэг аж ахуй нэгж, байгууллагуудад өгөгдсөн үүрэг даалгаврын дагуу өнгөрсөн амралтын өдрүүдэд нийтийн тээврийн үйлчилгээнд явдаг бүх автобус, троллейбусыг хамруулсан их цэвэрлэгээг зохион байгуулсан байна.
Энэ сарын 12-ны өглөө автотээврийн хяналтын улсын байцаагч нар 17 аж ахуйн нэгжийн 781 нийтийн тээврийн хэрэгслийг шугам замд гарахын өмнө дотор, гадна цэвэрлэгээ, суудлын бүрээсийн бүрэн бүтэн байдал, ерөнхий өнгө үзэмж, урд, хажуу, хойд талын чиглэлийн хаяг, хаягны гэрэлтүүлэг, заалны дулаацуулга болон гэрэлтүүлгийг голчлон шалгаж, илэрсэн зөрчлийг даруй арилгах үүрэг даалгаврыг ААН-үүдэд өгч ажилласан аж. Мөн өнөөдөр дахин шалгалт хийхэд ААН-үүд зөрчлөө нэн даруй арилгасан байжээ.