Энэ онд инфляц найман хувиас хэтрэхгүй байх зорилтыг Монголбанк мөнгөний бодлогодоо тусгаад байгаа. Ингээд тус банк  инфляцын ээлжит төсөөллөө гаргалаа. Тэгэхдээ бодлогын хүүг өөрчлөхгүй, ОУВС-гийн “Өргөтгөсөн санхүүжилтийн хөтөлбөр”-т тусгагдсан мөнгөний болон төсвийн бодлогын арга хэмжээнүүд хэрэгжинэ, уул уурхайн бүтээн байгуулалтын үйл ажиллагаа үргэлжилнэ гэсэн таамаглалт нөхцөлийг ашиглажээ. Инфляц цаашид харьцангуй тогтвортой байж, зорилтот түвшний орчимд хадгалагдах төлөвтэй байна. Төсөөллөөр энэ онд нийлүүлэлтийн шинжтэй хүчин зүйлсийн нөлөө бага байх нь. Харин  эдийн засаг сэргэж буй тул  эрэлтийн шинжтэй нөлөө нэмэгдэх боловч эрчимжихээргүй байна хэмээн төсөөлөв. Нийлүүлэлтийн шалтгаантай инфляцын хувьд хэрэглээний сагсны өөрчлөлт, суудлын автомашины татвар, хатуу түлшний үнийн огцом өсөлт зэрэг хүчин зүйлсийн нөлөө саарах төлөв ажиглаж буй аж. Нөгөө талаас өвөлжилт сайнгүй байснаас үүдэн махны үнэ оны эхэнд огцом өссөн. Цаашид махны үнэ өнгөрсөн оноос өндөр хэвээр хадгалагдах төсөөлөл бий. Энэ нь хүнсний инфляцыг нэмэгдүүлнэ хэмээн төв банкнаас үзэв. Харин импортын барааны инфляцад эзлэх нөлөө сүүлийн саруудад буурлаа. 2019 онд уул уурхайн бус салбарын идэвхжилтэй холбоотойгоор хүнсний бус инфляц 2018 оны түвшнээс бага зэрэг өсөх төсөөлөл гарлаа.