2019 оноос буюу ирэх өвөл Улаанбаатар хотод түүхий нүүрс оруулж ирэхийг Засгийн газраас хориглоод байгаа. Гэр хорооллын иргэд жилд 600-800 мянган тонн түүхий нүүрс түлшинд хэрэглэж өвлийг давдаг тооцоо бий. Тэгвэл хотын засаг захиргаанаас мэдээлж буйгаар гэр хорооллын өвлийн хэрэгцээнд зориулж эхний ээлжинд 200 мянган тонн шахмал түлш үйлдвэрлэж байгаа аж. Энэ шахмал түлшийг хаана, хэрхэн борлуулах ажлыг Нийслэлийн захиргаа харицах болжээ.
Шахмал түлшний үнэ нь түүхий нүүрснийхтэй адил хэмжээнд борлуулахаар төлөвлөөд байна. Мөн аравдугаар сарын 1-н гэхэд 100 квт-аас дээш хүчин чадалтай 500 зууханд шүүлтүүр тавих гэнэ. Түүнээс гадна 40 мянган өрхөд халаагуур олгох аж. Ингэснээр Улаанбаатар хотын агаарын бохирдолыг бууруулна хэмээн үзэж байгаа юм. Орон сууцжуулж байж агаарын бохирдолын асуудлыг шийднэ гэдэг. Иймд Засгийн газар, Улаанбаатар хотын захиргаанаас уг асуудлыг оновчтой шийдэх гарцыг хайн судалж байгаа ажээ.
