Алтны асуудлыг хэлэлцэж байна. Өөрөөр хэлбэл энэ металын хайгуул, олборлолтыг эрчимжүүлэх, тушаалтыг нэмэгдүүлэх, валютын ханшийг тогтворжуулах, нийлүүлэлтийн сүлжээг албажуулж, эрх зүйн орчныг боловсронгуй болгох, байгаль орчины хамгаалал, хууль бус алт олборлолт, татварын талаар хэлэлцэж эхлэв. Энэ хэлэлцүүлгийг УУХҮЯ, Монголбанк болон Bloomberg TV Mongolia телевиз хамтран зохион байгуулж буй юм.
”Алтны Форум”-д ЗГХЭГ, УУХҮЯ, АМГТГ, Монголбанк, Сангийн яам, БОАЖЯ, Цагдаагийн ерөнхий газар, Тагнуулын Ерөнхий Газар, Мэргэжлийн Хяналтын Ерөнхий Газар зэрэг төрийн байгууллагуудын төлөөлөл, алт олборлогч компаниуд, эдийн засагч, салбарын судлаач шинжээчид зэрэг салбарын оролцогч бүх талууд оролцож байна.
Ханшийн өсөлтийг хазаарлаж, гадаад валютын нөөцөө нэмэгдүүлэх замаар төгрөгийн ханшийг тогтворжуулах, улмаар макро орчинд үүсэх эрсдэлүүдээс сэргийлэх нэг суваг нь алтны нөөцөө өсгөх явдал гэдэг. Монгол Улс 2012 оноос алтны нөөц ашигласны татвараа бууруулж, өсөн нэмэгдэх татварыг нь тэглэсэн. Сүүлийн таван жилд алтны татварын хууль хэрэгжсэнээр төв банкны алтны нөөц долоо дахин нэмэгдэж, Монгол Улс гадаад валютын албан нөөцөө өсгөх боломжтой болсон юм. Тэгвэл 2013 оноос хэрэгжүүлж эхэлсэн энэ хуулийн үйлчлэх хугацаа таван жил буюу 2018 оноор эцэслэх аж.
