УИХ дахь Ардчилсан намын бүлгээс цаг үеийн асуудлаар хэвлэлийн хурал хийв. Энэ үеэр УИХ дахь Ардчилсан намын бүлгийн дарга Д.Эрдэнэбат “Улс төрийн одоогийн үйл явцтай уялдан Ардчилсан намын Улс төрийн зөвлөлийн шийдвэрийн дагуу УИХ-ыг нэн яаралтай тарааж, ээлжит бус сонгуулийг зарлан хуралдуулах талаар тогтоолын төслийг санаачлан боловсруулж, гишүүдийн дэмжлэгийг авч УИХ-д өргөн мэдүүлэхээр шийдвэр гаргасан. Дэмжиж буй гишүүдийн гарын үсгийг зуруулах самбарыг чуулганы хуралдааны үүдэнд байрлуулсан. Өнөөдрийн байдлаар УИХ-ын 14 гишүүн гарын үсэг зураад байна.

Бид цаашдаа ямар байр суурьтай байхаа ярилцлаа. УИХ-ын чуулганы дэгийн тухай, УИХ-ын тухай хууль шинэчлэн батлагдаж энэ сарын 25-наас хэрэгжиж эхэлнэ. Үүнтэй холбоотойгоор гарын үсэг зурах үйл ажиллагааг урьдчилан хийж байх шиг байна. Гишүүд өөрсдийн итгэл үнэмшлээр гарын үсэг зурах байх гэж найдаж байгаа. АН-ын бүлэг нэг л байр суурин дээр байгаа. УИХ өөрөө тарах тогтоолын төслөөс өөр бичигт гарын үсэг зурахгүй. Энэ хэвээрээ цааш явна. УИХ-ын даргыг огцруулах асуудал хуулийн дагуу явж байгааг зүйтэй гэж харж байна. Гэхдээ бидний УИХ тарж, ээлжит бус сонгуулийг зарлан хуралдуулах нь зүйтэй гэсэн байр суурин дээрээ байгаа” гэв.