УИХ-ын дарга хэн байх вэ гэдэг асуулт хүн бүхний анхаарлын төвд байна. Хэвлэл мэдээллийн хэрэгслээр янз бүрийн таамаг явж буй. Харин иргэд нас тогтсон, нийгэмд хүлээн зөвшөөрөгдсөн хүн байх ёстой гэсэн байр сууриа сошиалаар илэрхийлээд байгаа. Тэгвэл УИХ-ын дарга асан М.Энхболдыг чөлөөлөгдөхөд хувь нэмрээ оруулсан УИХ-ын гишүүн Л.Болд ийм байр суурьтай байна.
“Одоо томилогдох УИХ-ын дарга нь гурван зүйлийг хийж чадах хүн байх ёстой. Нэгд, баялгийг ард түмэнд өгөх, энэ хуулийн төлөө цуцашгүй явах хүн. Хоёрт, хууль эрхзүйн байгууллагуудыг шинэчлэх, шударга бусын хонгил гээд байгаа тогтолцоог шинэчлэх, С.Зоригийн амь насыг хөнөөсөн хэргийн үнэн мөнийг тогтоож чадах хүн байх ёстой. Гуравт, төрөө цэвэрлэж чадах хүн байх ёстой. ЖДҮ бол маш том мөсөн уулын оргил. Үүний цаана гуч гаруй ЖДҮ шиг сан байгаа, дээр нь концесс элдэв зээл, бонд, 60 тэрбумын асуудал гээд л. Энэ бүгдийг яаралтай бүрэн шинэчлэхийн төлөө зогсох хүн байх ёстой. Түүнээс биш нас нь сонирхолтой биш, жил нь, туршлага нь сонирхолтой биш л дээ” гэв.
