УИХ-ын гишүүн Л.Болдоос цаг үеийн асуудлаар зарим зүйлийг тодрууллаа.

-Намрын чуулганаар 25 хуулийн төсөл хэлэлцэх байсан ч ердөө 5-ыг нь хэлэлцсэн. Ээлжит бус чуулганаар үлдсэн хуулийн төслүүдийг хэлэлцэх үү, эсвэл өөр асуудлууд байх болов уу. Энэ талаарх таны бодол?

-Өөр асуудлуудыг ярих ёстой гэж бодож байна. Өнөөдөр бидэнд юу тулгамдаж байна вэ гэвэл ордуудаа ард түмний мэдэлд авмаар байна. Шударга бусын хонгил гэж яригдах болсон хуулийн байгууллагуудын шинэчлэлийг хийх. Төрийн бүх томилгоонуудыг нээлттэй сонсголоор, ил тодоор хийгддэг болмоор байна. Энэ мэтээр олон асуудал бий. Тиймээс энэ бүгдийг тодорхой болгох хэрэгтэй байгаа учраас ээлжит бус чуулганыг яаралтай хуралдуудах шаардлагатай гэж харж байна.

-Зарим УИХ-ын гишүүн Ээлжит бус чуулганыг хуралдуулах шаардлагагүй. Жагсаал, цуглаанаас болж хугацаа алдсан учир зохион байгуулсан гишүүд хариуцлагыг нь үүрэх ёстой гэсэн байр суурьтай байх шиг?

-Ард түмэндээ хариуцлага үүрүүлдэг их хурал гэж байдаггүй. Ард түмэн өөрөө талбай дээр гарч жагсч, шаардлагаа тавьсан. Тэмцлийн өдрүүдэд нийгэм буцалж байсан. Тэр өдрүүдэд нийгэм маш том улс төрийн боловсрол олж авсан. Юун болж, болохгүй байгааг, хэн нь хэн бэ гэдгийг таньж авсан. Хуралдахаасаа илүүтэй Монголын нийгэм бүхэл бүтэн нэг шат ахисан. Монголын ардчилал нэг шат ахисан.

-Нэн тэргүүнд ямар хуулиудаа хэлэлцвэл зохилтой вэ?

-Баялгийн хуулиуд, хуулийн шинэчлэлүүд, Улс төрийн намын хууль, Сонгуулийн хуулийг шинэчлэх гээд олон асуудал байна.