Өнгөрсөн сарын 16-нд НИТХ хуралдаж, хотын даргаар С.Мөнхчулууныг сонгож улмаар нэгдүгээр сарын 23-нд НИТХ-аас Ерөнхий сайдад түүнийг батламжлуулах албан бичгийг өгсөн. Гэвч Ерөнхий сайд тус албан бичгийн хариуг өгөлгүй өдийг хүргээд байсан юм. Тэгвэл албан ёсны хариуг өчигдөр өгсөн байна.

Тодруулбал, Нийслэлийн Засаг даргаар батламжлахаас татгалзсан тухай Монгол улсын Ерөнхий сайдын 2019.02.15 ны өдрийн ЗГ-1/21 дугаартай албан бичиг сошиал сүлжээгээр явах болов. Энэ талаар С.Мөнхчулуун өөрийн цахим хуудаснаа “Албан бичигтэй холбогдуулан маш олон найз нөхөд, иргэд сонгогчдын зүгээс тайлбар хүсч байна. Өчигдөр 17:47 д НИТХ ажлын албаны дарга утсаар залгаж татгалзсан бичиг ирсэн тухай танилцуулаад, хуулбарыг нь явуулъя гэж хэлсэн. 18:18 минутад би хуулбарыг нь чатаар авсан. Надад одоогоор өөр мэдээлэл байхгүй. Өнгөт зургийг нь хэвлэлээс л олж харсан болно. Намайг дэмжиж байгаа та бүхэндээ баярлалаа. Итгэлийг зүтгэлээр хариулах болно” хэмээн бичсэн байна.