Ардчилсан эмэгтэйчүүдийн холбоо Гэр бүлийн тухай хуулийг орон даяар олон нийтээр хэлэлцүүлэх санаачилга гаргаж, “ХАМТДАА ХЭЛЭЛЦЬЕ” аяныг ирэх сарын 01-нээс зургадугаар сарын 01 хүртэл гурван сарын хугацаанд явуулах болсноо өнөөдөр хэвлэлийнхэнд мэдээллэв.

“Гэр бүлийн хууль нь Монгол хүн бүр, өрх бүрийн амьдрал, өрхийн гишүүдийн харилцааг зохицуулдаг нийгмийн харилцааны хамгийн чухал суурь хууль юм. Иймээс бид онцгой анхаарлаа хандуулж байна. Аяны хүрээнд Засгийн газраас УИХ-д өргөн мэдүүлэхээр боловсруулсан Гэр бүлийн тухай хуулийн төслийг олон нийтэд бүхий л сувгаар танилцуулан өргөн хүрээнд хэлэлцүүлэг өрнүүлэх бөгөөд үр дүнг нийтэд мэдээлнэ. Саналуудыг нэгтгэж хууль санаачлах эрх бүхий Монгол Улсын Ерөнхийлөгч, УИХ-ын эмэгтэй гишүүд, Засгийн газарт хүргүүлнэ. Энэ аяны ач холбогдол нь Гэр бүлийн хууль тогтоомж, төрийн бодлогыг боловсронгуй болгоход дэмжлэг үзүүлэхэд орших юм” хэмээн тэд ярилаа.