Нийслэлийн ИТХ-ын ээлжит бус VI хуралдаанаар хотын даргад томилох тухай асуудлыг хэлэлцсэн билээ. Улмаар төлөөлөгч С.Мөнхчулуун олонхийн санал авсан боловч Монгол Улсын Ерөнхий сайд У.Хүрэлсүх түүнийг хотын даргад батламжлахаас татгалзсан. Тиймээс холбогдох хуулийн дагуу нийслэлийн ИТХ 15 хоногийн дотор хуралдаж, санал хураалт явуулж нийслэлийн Засаг даргаа томилох үүрэгтэй. Энэ хүрээнд нийслэлийн Засаг даргыг томилох НИТХ-ын ээлжит бус VII хуралдаан өнөөдөр болов.
Энэ удаагийн сунгаанд НИТХ-ын дарга С.Амарсайхан МАН-аас, НИТХ-ын төлөөлөгч С.Мөнхчулуун заалнаас нэр дэвшиж өрсөлдсөн юм. Санал хураалтын тооллогын комисст Н.Батсүмбэрэл, Д.Амарбаясгалан, Н.Баярсайхан, Г.Төмөрбаатар, Одонтунгалаг нар багтаж ажилласан байгаа. 45 саналын хуудсаас нэгийг нь хүчингүйд тооцсон байна.
Санал хураалтаар С.Мөнхчулуун 19, С.Амарсайхан 25 санал авч 56,8 хувийн саналаар хотын даргаар сонгогдлоо. Өнөөдрийн хуралдаанаар дэмжигдсэн төлөөлөгчийг Ерөнхий сайд У.Хүрэлсүх ажлын тав хоногт батламжлах хуулийн зохицуулалттай байгаа.
