УИХ-ын гишүүн Ж.Батзандан, Л.Болд, ЗГХЭГ-ын дарга Л.Оюун-Эрдэнэ нар цаг үеийн асуудлаар мэдээлэл хийлээ. Энэ үеэр УИХ-ын гишүүн Л.Болд “461 дүгээр ангид ажиллалаа. Тэнд хүний эрхийн нөхцөл байдал нэлээд хүндэрснийг харлаа. Бид Эрүүгийн хууль тогтоомжуудыг шинэчилснээр Монгол Улсад эрүү, шүүлтийг байхгүй болгож, шүүхийн өмнө бүх хүн тэгш байх зарчим хэрэгжих тогтолцоог нэвтрүүлсэн гэж бодож явсан. Гэтэл бахь байдгаараа байна. Өмнө нь очиж байхад 300, 400 хүн хоригдож, шалгагдаж байдаг байсан. Гэвч эргээд 1000 хол давсан хүн шалгагддаг, хоригддог нөхцөл байдал үүссэн байна. Хэдэн жилийн өмнө амьдаар нь тамладаг газар гэж АТГ-ыг шүүмжилдэг байсан. Тэгвэл өнөөдөр 461 дүгээр анги амийг нь тасалдаг газар гэмээр болж. Шалгагдаж байгаа хүн амь насаа хохироох ийм нөхцөл байдал бодитой нүүрлэсэн нөхцөл байдлыг очиж харлаа.

Маш олон эмэгтэйчүүд тэнд шалгагдаж байна. Монгол Улсад эрүү шүүлтийг бүрмөсөн халж, хүний эрхийн нөхцөл байдлыг бүрэн мөрдүүлэх энэ тогтолцоо бидэнд маш чухал. Тийм учраас Монголын энэрэнгүй шүүх Эрдэнэтийн хэрэгт шалгагдаж байгаа хүмүүсийг маш хурдан хэлэлцээд чөлөөлсөн байна. Яг үүн шигээ 461 дүгээр ангид олон жил сараар өмгөөлөх эрхээ хасуулчихсан, жижиг хэмжээний санхүүгийн зөрчил дээр шалгагдаж байгаа эмэгтэйчүүдийг суллахыг шаардаж байна.

Эмэгтэйчүүд, эхчүүдийн баярын өдрөөс өмнө буюу өнөөдөр суллахыг шаардаж байна. Тэднийг суллахыг Монголын энэрэнгүй шүүгчдээс хүсч байна. Бидний тэмцэл хулгай, луйврыг зогсоох, стратегийн орд баялгийг ард түмэндээ авч өгөх. Ард түмэн түүний үр ашгийг зөв хүртэх ийм л тэмцэл юм шүү. Тэрнээс бид хэн нэгэн хүнийг шоронд хийх, хэлмэгдүүлэх, иргэний эрх, хүний эрхийг нь зөрчихийн төлөө нэг ч шаардлага, алхам хийгээгүй.

Гэхдээ бид тэмцлээсээ сөөм ч ухрахгүй. Бидний тэмцэл секунд ч сулрахгүй гэдгийг хариуцлагатайгаар мэдэгдье” гэлээ.