УИХ дахь АН бүлэг УИХ-ын гишүүн Ж.Батзанданг АН-аас 4 жилийн хугацаатайгаар хөөж, Л.Болд, Д.Мурат нарыг сонгуульд нэр дэвшүүлэх эрхээс нь хасаж байгаагаа мэдэгдсэн үйл явдал өнгөрсөн оны арванхоёрдугаар сард болсон. Үүнтэй холбогдуулан УИХ-ын гишүүн Л.Болд “АН бүлэгтэйгээ үлдэхийн тулд Ж.Батзанданг хөөж, намайг үлдээж доромжиллоо. Би АН-ын бүлгээс гарна” гэдгээ мэдэгдэж байсан удаатай. Ийнхүү УИХ-ын гишүүн Л.Болд намаасаа гарч байгаагаа мэдэгдсэнээр УИХ дахь Ардчилсан намын бүлэг тарах эрсдэл үүссэн билээ.
Тэгвэл бүлэг тарах эсэх талаар Ардчилсан намын бүлгийн дарга Д.Эрдэнэбат өнөөдөр сэтгүүлчдэд дараах мэдээллийг өглөө.
“Бид хаврын ээлжит чуулганы эхэнд шууд бүлгийн үйл ажиллагааг дуусгавар болгох мэдэгдлээ УИХ-ын даргад өгнө. Төслөө бэлдээд гарын үсэг зурчихсан байгаа. Л.Болд гишүүн өөрийнхөө сонголтыг хийсэн юм шиг байна. Өөрийн бодол өөртөө зөв. Бид энэ асуудалд хүндэтгэлтэй хандана. Ямар ч асуудал байхгүй. Бүлэг байхгүй боллоо гээд Ардчилсан нам үгүй болно гэсэн үг биш. бид сөрөг хүчин хэвээрээ байна. Үйл ажиллагаагаа явуулдаг хэвээрээ явуулах болно. Гишүүд нь байна, бидний үзэл баримтлал ч байна. Тиймээс цаашдаа эрх баригчдын алдаатай бүх асуудалд дээр өөрсдийнхөө дуу хоолойг хүргээд явахад ямар ч асуудал байхгүй. Зөвлөлийн хэлбэрт шилжээд л явна. Яахав алдагдах боломж нь завсарлага авах асуудал л алдагдах байх. Тиймээс бүлгийн асуудлаар улс төржих ямар ч шаардлага байхгүй” гэв.
