ХЗДХ-ийн сайд Ц.Нямдорж өнөөдөр Засгийн газраас гаргасан шийдвэрийг танилцуулах үедээ С.Зориг агсны хэрэгтэй холбоотой мэдээлэл өгөв. Тэрбээр “С.Зоригийн амь насыг бүрэлгэсэн хэргээр ялласан хоёр хүнд эрүүдэн шүүлт, 1937 оны хэлмэгдүүлэлт явуулсныг тогтоож байна. Энэ хэргийн талаар маш ноцтой асуудал илэрч буй. Тодорхой хүмүүсийг баривчилсан хэмээн ярив. Тэрбээр мөн “Би тэр хоёр ялтантай очиж уулзсан. Эмнэлэгт хэвтүүлсэн. Миний чадах юм энэ. Цаашид эмнэлэгт хэвтүүлж байгаад гаргана гэж бодож байгаа. Би уучлал гуйж байгаагүй хүн. Харин энэ удаад ХЗДХ-ийн сайдын хувиар Содномдаржаа Чимгээгийн ар гэрийнхнээс уучлал гуйж байна. Монголын хуульчид эрүүдэн шүүх явдлыг системийн өөрчлөлт хийж өөрчлөх шаардлагатай юм байна. Би ийм аймшигт юм үзээгүй. Аймшигтай юм болоод байгаад мэдсэн учраас хэд хэдэн хэрэг үүсгэсэн. Захиалагчийг олох нь битгий хэл бүр замхаруулсан байна билээ. Цаашлаад хариуцлагагүй шалгасан, шүүсэн хүмүүсийн асуудал яригдана. Энэ хол явах асуудал шүү.
С.Зоригийг амь нас хохирсон хэрэг дээр сүүлийн үед тагнуулын байгууллага их нааштай ажиллаж байгаа. АТГ ч учир зүйг нь олох гэж дэмжиж байгаа. Би мөрдөн байцаах ажил эрхэлж, прокурорт ажиллаж, цаазын ялтай хүний сүүлийн мөчид нь ч уулзаж зөндөө л юм үзсэн. Гэтэл үүн шиг аюултай юм үзээгүй, сонсоогүй” гэв.
