Зам тээвэр, барилга, хот байгуулалтын яам, Газрын харилцаа, барилга, геодези, зураг зүйн газар, нийслэлийн ЗДТГ, төрийн байгууллагууд болоод  Япон улсын Газар, дэд бүтэц, зам, тээвэр, аялал жуулчлалын яамтай хамтран “Монгол-Японы хот байгуулалтын салбарын семинар”-ыг ирэх сарын 11-ний өдөр Улаанбаатар хотод зохион байгуулах гэж байна. Монгол дахь Япон улсын Элчин сайдын яам, Японы ОУХАБ(JICA), Хоккайдо муж болон Саппоро хотын захиргаа зэрэг байгууллагууд уг семинарыг дэмжин оролцох бөгөөд хоёр улсын орон нутгийн байгууллагууд, хувийн хэвшлийн төлөөллүүд мөн  оролцох ажээ. Уг семинар нь Монгол Улсын хот байгуулалтын салбарын үйл ажиллагааг эрчимжүүлэх, хот байгуулалтын үйл ажиллагаанд оролцогч талуудын хамтын ажиллагаа, хоорондын уялдаа холбоог сайжруулах, хоёр улсын төр хувийн хэвшлийнхний хоорондын найрсаг харилцааг гүнзгийрүүлэн хөгжүүлэх, гэр хорооллыг хөгжүүлэх, агаарын бохирдол, нийтийн тээвэр, авто замын түгжрэл зэрэг Улаанбаатар хотод тулгамдаад буй асуудлуудыг шийдвэрлэх талаар санал бодлоо солилцох зорилготой юм байна. Тус семинарын  салбарын хуралдаанаар “Нийтийн тээврийн гол  шугамын дагуух орчныг хөгжүүлэх ба түүний үр өгөөж”, “Хүйтэн бүсийн нутагт зам тавих технологи”, “Байгаль орчинд ээлтэй нийтийн орон сууц барих бодлого” зэрэг Улаанбаатар хотод тулгамдсан, нэн даруй шийдвэрлэх шаардлагатай сэдвийн хүрээнд явагдах аж.