Халын голын дайны ялалтын 80 жилийн ойг тохиолдуулан манай улсад хүрэлцэн ирсэн ОХУ-ын Агаар-сансрын хүчний гвардын 234-р нисэх хорооны “Русские Витязи” багийнхныг “Чингис хаан” Олон улсын нисэх буудалд хүлээн авч, газрын болон навигацын үйлчилгээ үзүүллээ.
Анх 1991 онд Москва хотын ойролцоох Кубинка агаарын баазад 6ш Су-27 онгоцтой байгуулагдаж байсан түүхтэй Оросын нисэх хүчний харьяа агаарын үзүүлбэрийн Русские Витязи буюу Оросын Баатрууд багийнхан маневр сайтай, хүчирхэг Су-30СМ сөнөөгч онгоцоор нисэх хүчнийхээ зэвсэг техникийн хүчийг харуулсан уран нислэгийн олон гайхамшигт үзүүлбэрүүдийг хийж, Хүй 7 худагт хуран цугласан монголчуудад нисэх урлагийн олон үзүүлбэрүүдээ толилууллаа.