Хүүхдийн мөнгө нэмэгдсэн дүнгээрээ буюу 30 мянган төгрөг өнөөдрөөс хүүхэд бүрийн дансанд орж эхэллээ. Засгийн газраас корона вирусийн дэгдэлтийн улмаас учирч буй эдийн засгийн хүндрэлийг даван туулахад иргэддээ дэмжлэг үзүүлэх зорилгоор авч хэрэгжүүлж буй багц арга хэмжээний хүрээнд хүүхдийн мөнгөн тэтгэмжийн хэмжээг 10 мянган төгрөгөөр нэмэгдүүлсэн билээ. Тиймээс энэ сараас эхлэн хүүхэд бүрт сард 30 мянган төгрөгийн тэтгэмж олгож байна. Хүүхдийн мөнгөн тэтгэмжийг нэмэгдүүлсэн арга хэмжээг эхний ээлжинд 3 сарын хугацаанд хэрэгжүүлэхээр төлөвлөж байгаа бөгөөд улс орны эдийн засгийн боломж зэргээс хамаарч сунгах эсэхийг шийдэх юм.