Олон улсын энхийг дэмжих ажиллагааны “Хааны эрэлд- 2012” хамтарсан сургуулийн  хаалтын ажиллагаа өчигдөр Тавантолгой дахь Зэвсэгт хүчний сургалтын нэгдсэн төвд боллоо. Энэ арга хэмжээнд УИХ-ын дарга З.Энхболд, Батлан хамгаалахын сайд Д.Бат-Эрдэнэ, УИХ-ын гишүүн, УИХ-ын Аюулгүй байдал, гадаад бодлогын байнгын хорооны дарга Ц.Цолмон, ЗХЖШ-ын дарга дэслэгч генерал Ц.Бямбажав, АНУ-ын Тэнгисийн цэргийн асуудал эрхэлсэн Рей Мэйбос, Батлан хамгаалахын атташе нар болон БХЯ, ЗХЖШ-ын удирдлагууд оролцсон юм.
“Хааны эрэлд 2012” цэргийн сургуульд гадаадын 15 орны цэргийн 1000 гаруй алба хаагч бэлтгэл хийсэн бол БНХАУ, ОХУ, Казахстаны зэвсэгт хүчнийхэн ажиглагчаар оролцжээ. Их Британи, БНЭУ, БНСУ, Япон, Канад, Австрали, ХБНГУ, Франц, Сингапур зэрэг 12 орны цэргийн алба хаагч штабын болон хээрийн сургалт дадлага, эмнэлэг, хүмүүнлэгийн тусламж, хээрийн нөхцөлд эмнэлгийн анхан шатны тусламж үзүүлэх сургалт, цэргийн барилга, инженерийн туршлага солилцсон байна. Түүнчлэн энхийг дэмжих цэргийн бэлтгэл сургуулийн хүрээнд гадаадын цэргийн эмч нар манай улсын 500 гаруй иргэнд эрүүл мэндийн үзлэг хийжээ.
“Хааны эрэлд-2012” хамтарсан цэргийн сургууль 10 хоног үргэлжилж, 11 дэх өдрөө хаалтаа хийсэн нь энэ.