Нийслэлийн хэмжээнд эрүүл ахуй, аюулгүй байдлын шаардлага хангаагүй, газар хөдлөлтийн эсрэг хамгаалалтгүй 283 барилга байдаг. Тиймээс эхний ээлжинд газар хөдлөлтийн хамгийн бага чичиргээнд ч нураад уначихаж мэдэхээр 10 орон сууцыг нурааж, 30 барилгыг сэргээн засварлахаар болжээ. Уг барилгуудад НМХГ хяналт шалгалт хийснээрээ “хүн амьдрах боломжгүй” хэмээх дүгнэлтийг гаргасан байна. Өнгөрсөн жил хуучин барилгыг нураах асуудал яригдаж эхэлсэн ч хөрөнгө мөнгөний асуудлаас болж удааширсан гэнэ. Энэ жилийн хувьд мэргэжилтнүүд нарийн тандалт судалгаа хийсний дүнд барилгын ажил эхлэхэд бэлэн болоод байгаа аж.