Өнөөдрөөс эхлэн нийслэлийн Засаг даргын замын хөдөлгөөний ачааллыг бууруулах зорилготой захирамж мөрдөгдөж төрийн албан хаагчид нийтийн тээврээр зорчихоор болсон. Ингээд энэхүү шийдвэртэй холбогдуулан зарим даргыг ажилдаа ямар унаагаар ирэхийг нь сонирхлоо. Тэдэнд та ч хяналт тавих эрхтэй.


Э.БАТ-ҮҮЛ: Өглөө эрт гараад алхана даа

/Нийслэлийн Засаг дарга бөгөөд Улаанбаатар хотын захирагч/

-Танай гэр хаана байдаг вэ?
-Энхтайваны өргөн чөлөөнд.
-Та ажил, гэрийн хооронд ямар унаагаар явах вэ?
-Автобусаар явна даа. Хааяа өглөө эртлэн гараад ажил руугаа алхана гэж бодож байгаа.
-Төрийн албан хаагчид нийтийн тээврээр ирж байгаа эсэхийг яаж хянах вэ?
-Хүмүүс ажилдаа ах, дүүгийнхээ машинаар хүргүүлээд байж болно. Эсвэл өөрийн машинаар хүргүүлж болно шүү дээ. Төрийн албан хаагчид машинаар ирж байгаа эсэх нь авто зогсоолоос харагдана. Хамгийн гол нь, авто зогсоолыг чөлөөлөх юм.


Н.ГАНТӨМӨР: Оройтвол нийтийн тээврээр явна

/Нийслэлийн Засаг даргын орлогч/

-Та аль дүүрэгт амьдардаг вэ?
-Яах нь вэ.
-Танай гэр хаана байдгийг л асууж байгаа юм?
-За, манай гэрийг мэдэж яах гээв.
-Ажилдаа ямар унаагаар ирэхийг тань тодруулах гэсэн юм аа?
-Аан. Явган явна даа. Оройтвол нийтийн тээврээр явна.
-Өдөр бүр үү?
-Тийм ээ. Нийслэлийн Засаг дарга өнөөдрөөс эхлэн /баасан гарагаас/ орлогч болон газрын дарга нарын автомашиныг баазаас гаргахгүй байхаар шийдвэрлэсэн. Тэгэхээр би машингүй болчихож байгаа биз дээ.


П.НАРАНЦЭЦЭГ: Үйлчилгээ муутай автобус компанийн гэрээг цуцална


/Нийслэлийн нийтийн тээврийн газрын дарга/

-Та даваа гарагаас эхлэн ажилдаа яаж ирэх вэ?
-Нийтийн тээврээр.
-Нийтийн тээвэрт явж буй автобуснууд шороо тоос­той, хөгжмөө чанга тавь­­­даг, үйлчилгээний соёл­­­гүй зэрэг олон дутаг­дал байдгийг та мэднэ биз дээ?
-Тийм ээ. Төрийн ал­бан хаагчид нийтийн тээв­рээр зорчих болсонтой хол­бог­дуулан бид арга хэмжээ авч байна. Автобус баазуудад кондуктор, жолооч нарыг дүрэмт хувцсаар ижилсүүлж, харилцааны соёлтой байх шаардлагыг биелүүлэхгүй бол гэрээг нь цуцлах болно. Үйлчилгээний чанараа сайжруулсан автобус баазуудыг урамшуулж,  1.8 тэрбум төгрөгийн шагналын сантай уралдаан зарласан. Сар бүр шалгаруулж, мөнгөн шагнал олгох юм.