Баянгол дүүргийн тавдугаар хороо, Шастины нэрэмжит III эмнэлэгийн баруун талд барьж байсан барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан хүүхэд дээрээс унаж, амь насыг нь хохироосон харамсалтай хэрэг өчигдөр орой гарсан.  Хариуцлага алдсан барилгын компанийн тухай мэдээллийг өнөөдөр НИТХ-ын дарга Д.Баттулга, Нийслэлийн МХЕГ-ын дарга Л.Бямбасүрэн нар хэвлэлийн хурал хийж өглөө.
Тус газарт барилга барих зөвшөөрлийг иргэн н.Батболд өнгөрсөн нэгдүгээр сард авсан бөгөөд “Тоёохиро” гэдэг компани зураг төслийнх нь ажлыг хариуцан авсан юм байна. Гэвч тэдний гаргасан зураг төслийг хотын захиргаанаас зөвшөөрөөгүй байхад дур мэдэн барилгын ажлаа эхлүүлжээ. Барилгын ажлыг “Төгс бүрэн” хэмээх компани гүйцэтгэж байсан аж. 13 давхар барихаар төлөвлөж байснаас одоо долдугаар давхартаа явж буй уг барилгын ажлыг гурван давхарт явж байх үед нь Нийслэлийн МХЕГ-аас зогсоох шаардлага өгсөн боловч дур мэдэн үргэлжлүүлсээр, өнөөдрийн ийм байдалд хүрсэн байна.  Осол гаргасан кран нь үзлэгт ороогүй, түрээсээр ажиллаж байсан техник гэнэ.
Энэ хэргийн тухай мэдээллийг бид дараа дэлгэрүүлэн хүргэх болно.