Энэ өвөл буюу арванхоёрдугаар сарын 21-23-нд нар хиртэж, цочир хүйтэрнэ гэсэн яриа гадуур тархаад буй. Энэ талаар Мөнх тэнгэр судлалын дэлхийн академийн хүндэт доктор, Монгол бөө мөргөлийн төвийн тэргүүн, яруу найрагч Д.Бямбадоржоос тодруулахад “Бөөгийн буултад цаг агаарын байдал өөрчлөгдөнө. Гэхдээ 2012 онд их хүн амьтан үхэж, дэлхий сөнөх хэмжээний хүйтрэл болохгүй гэж хэлсэн байдаг. Өөрөөр хэлбэл, галав юүлнэ гэдэг чинь усан галав болж, мөстлөгийн эрин үе эхлэхийг хэлдэг юм. Харин энэ өвөл хүйтний градус хэвийн байдлаасаа хэдэн хэмээр нэмэгдэх байгалийн түр зуурын үзэгдэл тохионо. Тийм аюултай байгалийн үзэгдлийг Монгол Улс үзэхгүй. Харин энэ өвөл Монголд их цас орж, зуд болох магадлал бий. Тиймээс аюулаас урьдчилан сэргийлж бэлтгэлээ сайн хангах хэрэгтэй. Сайн бэлтгэлтэй малчин, сайхан сэтгэлтэй хүн даваад гарах гэрэл бий. Сайхнаар бодож, сэтгэж байх хэрэгтэй” гэлээ.