Нийслэлийн Засаг дарга Э.Бат-Үүл, Нийслэлийн Засаг даргын Тамгын газрын дарга Ё.Гэрэлчулуун  нар энэ сарын 4-нд Багануур дүүрэгт ажиллаж  Засаг даргын Тамгын газар болон  тавдугаар хорооны ажилтай  танилцаж  дүүргийн дэргэдэх хэлтэс, албадын удирдлагууд,  иргэдийн төлөөлөлтэй уулзлаа. Нийслэлийн Засаг дарга уулзалтын үеэр нийслэлд хийж буй цаашид хийхээр төлөвлөсөн ажлуудын талаар товч мэдээлэл өгч гэр хорооллыг амины тохилог сууцтай болгох ажил нэлээн өргөн далайцтай явж байгаа,   дахин төлөвлөлт зайлшгүй хийх хэрэгтэй, 2013 онд 40.000 айл өрх гэр хороололд амины тохилог сууцанд амьдарна, энэ ажилд иргэдээ татан оролцуулна гээд  иргэдийн санал хүсэлтийг сонслоо.
 Уулзалтад оролцсон иргэд хотын даргын хийж хэрэгжүүлж буй ажилд сэтгэл хангалуун байгаагаа илэрхийлж Багануур дүүргийг хөгжүүлэх, бие даасан хот болгох тухай асуудлаар санал хүсэлтээ илэрхийллээ. Харин Нийслэлийн Засаг дарга Э.Бат-Үүл Багануур дүүргийг аж үйлдвэрийн хот, дүүргийн төв болгохоор Улаанбаатар хотыг хөгжүүлэх ерөнхий төлөвлөгөөний тодотгол,  2030 оны чиг хандлагад тусгасан байгааг дурдаад, хотын хөгжлийн ерөнхий төлөвлөгөөний тухай хууль батлуулахаар ажиллаж буйгаа хэлжээ.