Замын зөрчил гаргаж,  137 ам.долларын торгууль хүлээсэн нэгэн эр шүүхэд торгуулиа төлөхөөр ирэхдээ 137 ширхэг нэгтийн доллараар хийсэн гахайн орегами  тушаах гэж оролджээ.  Мэдээж  шүүхийн ажилтанд түүний хошин шогийн мэдрэмж таалагдаагүй учир бүгдийг нь задлаад тушаахыг хүсчээ. Харин торгууль төлөгч эр өөдөөс нь “Яагаад? Энэ бол хүчин төгөлдөр мөнгөн дэвсгэрт.  Үүний ямар хэлбэртэй байх нь чухал биш. Тэгээд ч тоолоход амар” гээд өөрөө гахайнуудаа тоолж эхэлжээ. Тэвчээр нь алдарсан шүүхийн ажилтан өөр нэгэн ажилтнаа дуудаж, байдлыг тайлбарлахад нөгөөх нь арай хошин шогийн мэдрэмжтэй нэгэн байсан тул “Энэ үнэхээр гоё юм аа. Гэхдээ ийм байдлаар хадгалахад хэцүү учир бүгдийг нь задалж өгнө үү” хэмээн хүсчээ. Эцэст нь торгууль төлөгч эр бүтэн дөрвөн цагийн хөдөлмөр гарган хийсэн гахайнуудаа задлан тушаасан бөгөөд шүүхийн ажилтан түүнийг нь тоолох гэж найман минут зарцуулсан гэнэ.