Улсын бүртгэлийн газар уламжлал ёсоор сар бүрийн хоёр дахь долоо хоногийн бямба гаригт нээлттэй хаалганы өдөр зарлаж, иргэдэд үйлчилдэг. Тэгвэл энэ удаагийнхаа нээлттэй хаалганы өдрөөр “Цахим үнэмлэх” сэдвийн дор хаалгаа нээжээ. Нээлттэй хаалганы өдрөөр Улсын бүртгэлийн ерөнхий газар улсын хэмжээнд  бүрэн бүрэлдэхүүнээр ажиллаж иргэдэд цахим үнэмлэх олгохоос гадна бусад ажлын өдрүүдэд үзүүлдэг иргэний гэр бүлийн байдлын найман төрлийн бүртгэл болон, эд хөрөнгийн эрхийн бүртгэл,  гадаад паспорт шинээр авах, хугацааны сунгалт хийх , архивын лавлагаа олгох зэрэг бүхий л үйлчилгээг үзүүлж байна.
Иргэний цахим үнэмлэх хэвлэх ажил өнөөдрийн  байдлаар 18 аймаг, нийслэлийн 4 дүүрэгт хийж дуусаад байна.Тус газраас оршин суугаа баг, хороон дээрээ очиж цахим үнэмлэхээ авахыг уриалж байна. Иргэд цахим үнэмлэхээ авахдаа өөрийн иргэний үнэмлэхээ авч очно. Харин иргэний үнэмлэхээ хаяж, үрэгдүүлсэн бол иргэний үнэмлэхийн зурагтай лавлагаа, лавлагаа аваагүй иргэд холбогдох бичиг баримтын хамт оршин суугаа баг, хорооноосоо иргэний цахим үнэмлэхээ авна уу.