Нийслэлийн шүүх МАХН-ын дарга, Ерөнхийлөгч асан Н.Энхбаяр нарын дөрвөн хүнд холбогдох хэргийг хэлэлцээд анхан шатны шүүхийн шийдвэрийг хэвээр үлдээсэн. Давж заалдах шатны шүүх хурлын талаар байр сууриа илэрхийлэхээр Н.Энхбаярын өмгөөлөгч С.Нарангэрэл хэвлэлийнхэнд хандлаа. Тэрээр “Зохион байгуулалттайгаар Н.Энхбаярт эрүүгийн хэрэг үүсгэсэн жүжгийг давж заалдах шатны шүүх үргэлжлүүлээ. Анхан шатны шүүхийн шийтгэх тогтоолд ямар ч өөрчлөлт оруулаагүй. Н.Энхбаяр даргыг дөрвөн үндэслэлээр буруутгаж ял оноосон анхан шатны шүүхийн гурван шүүгч, давж заалдах шатны шүүхийн мөн гурван шүүгч, хэрэгт анхнаасаа хяналт тавьсан хоёр прокурор урьдчилан бэлтгэсэн улс төрийн захиалгыг биелүүлсэн гэж үзэж байна” гэв. Түүнчлэн цаашид хяналтын шат буюу Улсын Дээд шүүхэд хандана. Өмнөх шатны шүүхийн шийдвэрийг хэвээр үлдээвэл Улсын Дээд шүүхийн Ерөнхий шүүгчид хандаж, хэргийг нийт шүүгчдийн хурлаар хэлэлцүүлэх гэнэ. Тэгээд ч анхан шатны шүүхийн шийдвэрт өөрчлөлт оруулахгүй бол Олон улсын шүүхэд хандах юм байна. Ингэхдээ Н.Энхбаярын хэргээр бус Монгол Улс хүний эрх, эрх чөлөөг хамгаалахаар олон улсын холбогдох гэрээ конвенцэд нэгдсэн. Эдгээр гэрээ конвенцын холбогдох заалтыг яаж хэрэгжүүлж, иргэний шударгаар шүүгдэх эрхийг хэр хангаж байгааг тогтоож өгөөч гэж Олон улсын шүүхэд хандах юм гэнэ. Тэгсэн тохиолдолд Н.Энхбаяр даргад холбогдох 52 хавтаст хэрэг материалд дээрх асуудлаар дүн шинжилгээ хийнэ гэсэн үг аж.