Гэм зэмгүй иргэдийнхээ аминд хүрч байж барилгын салбарын булхай, луйвар илэрлээ. Нэг үхрийн эвэр доргивол мянган үхрийн эвэр доргино гэгчээр бүгд л барилгынхныг муу хэлцгээж байна. Гэхдээ буруутай, зөрүүд цөөн хэдэн нөхрөөс болж ийм байдал үүссэн юм биш. Барилгын салбар нийтээрээ доголдолтой байгаа тухай ярьж буй. Улаанбаатар хотод найм биш 80 барилга зөвшөөрөлгүй баригдаж байна. Эх орны зүрх нь болсон хот минь ингэтлээ эзэнгүйтсэн байж. Мэргэжлийн хяналтынхан “эрх зүйн орчин муугаас ийм боллоо” гэж биеэ өмгөөлнө. Одоо тэгтэл тэднийгээ нураах ч, байх ч биш болчихоод байна.
Бас л эрх зүйн орчин нь болж өгөхгүйгээс шууд “нураа” гээд зарлигдчихаж болохгүй байгаа аж. Нийслэлийн удирдлагууд “сайн нягталж, шалгаж байж шийдвэр гаргая. Зайлшгүй нураах ёстойг нь л нураая” гэж лүндэн буулгасан. Чухам хэд нь зайлшгүй нураах шаардлагатайд тооцогдохыг бүү мэд. Одоо лавтай, тэдгээр барилгын эзэн нь “минийхийг л битгий нураагаасай” гэж залбирч суугаа биз. Гэхдээ энд нэг зүйл ажиглагдаж байна. Зөвшөөрөлгүйгээр барилгын ажлаа явуулж байсан 79 барилгыг жагсаахад 30 гаруй нь орон сууцных. Эдгээр барилгыг нураах эсэх талаар нийгэмд хэлэлцүүлэг өрнүүлбэл бас нэлээд хүчтэй мэтгэлцээн болж ч магад. УИХ-аас томилогдсон ажлын хэсэг НИТХ-ын дарга, агентлагуудын удирдлагуудтай хуралдаад хотын эрх зүйн орчныг шинэчлэх ажлын хэсэг гаргасан. Удахгүй шинэчлэгдээд, жигдрээд ирэхээрээ яаж шийдэгдэх нь тодорхой болох биз. Хамгийн гол нь, энд хувь хүн, жирийн иргэний захиалгаар барьж буй нь байхад, томоохон хотхон, нэртэй констракшнуудын барилга ч байна. Тэгээд ч зогсохгүй төрийн байгууллага, тухайлбал Сүхбаатар дүүргийн цагдаагийн хэлтэс, Гаалийн ерөнхий газар, Батлан хамгаалах яамны захиалгаар баригдаж байгаа нь ч бий. Энэ бүгдэд дээрээс гаргасан тушаал захирамж адил тэгш үйлчлэх үү гэдэг нь сонин.