Иргэний цахим үнэмлэх олгох ажлыг эрчимжүүлэх ажлын хүрээнд Улсын бүртгэлийн ерөнхий газрын харьяа аймаг, сум, дүүрэг, хорооны Иргэний бүртгэлийн ажилтнууд өнөөдөр ажиллаж байна. Учир нь нийслэлийн иргэд харьяа хорооны ажилтнаас цахим үнэмлэхээ авахдаа хойрго хандаж байгааг УБЕГ-аас мэдээлсэн. Тиймээс ажлын өдрүүдэд бичиг баримтаа авч амжаагүй бол өнөөдөр иргэний цахим үнэмлэхээ харьяа дүүрэг, сумдын  иргэний бүртгэлийн ажилтнаас очиж авч, бичиг баримтын зөрчилтэй бол зөрчлөө арилгуулж болох нь.
Аймаг, сум, дүүргийн Иргэдийн төлөөлөгчдийн хурлын сонгууль энэ оны арваннэгдүгээр сарын 21-нд болох тов гарсан. Үүнтэй холбогдуулан Улсын бүртгэлийн ерөнхий газраас Аймаг, сум, дүүргийн Иргэдийн төлөөлөгчдийн хурлын сонгуулийн тухай хуулийн 21.2 дахь хэсэгт заасны дагуу иргэдийн засаг захиргааны нэг нэгжээс нөгөө нэгжид шилжин суурьших хөдөлгөөнийг энэ сарын 22-ноос арваннэгдүгээр сарын 21 хүртэл түр зогсоогоод байна.